2Pe 1 | WSK | STEP | Ani Simon Peter, Jesus Kristus ko ura kari se ko apostle, bare den imi bataguru nina aninga Kris launuria bare ningarsam. Jesus Kristus, nanga Kaem se nanga Sangaru Ta Kari, mu ko munan diram nunguningkiri, se nu nangamang ningi nunguning ko munan ana nangaram mu turantala mu nina ningaram.

2 Peter 1

Den gira

1 Ani Simon Peter, Jesus Kristus ko ura kari se ko apostle, bare den imi bataguru nina aninga Kris launuria bare ningarsam. Jesus Kristus, nanga Kaem se nanga Sangaru Ta Kari, mu ko munan diram nunguningkiri, se nu nangamang ningi nunguning ko munan ana nangaram mu turantala mu nina ningaram.

2 Nina Kaem se nanga Biya Jesus Kristus nunga ikisan mu te, nina nunga nongomang yawara, se nunga lila ninguru ko ikialko.

Kris alo Kaem ko munan karo tumonko sail tagimonko

3 Kaem kota gomang nangaram ale nanga auram, ana noko bagara yawara nikinang ago wore te ilak baganakko. Se ana noko ikiman mu te nu ko marak sokel terong ma la nangaram, se ana marak sokel umutang te ana aolak bagara diram la nu koma te baganakko terong mam. 4 Sokel umutang te tala, nu munan yawara yawara nangarukko ko balam mu nangaram, mu te ana ali imi ko ikia memek nangamang barasa, te nama magasan, mu nabiring tunakko mu terong mam, ale Kaem ko marak, se ko munan diram te bagoso mu turantala ana te baganakko.

5 Buta se nina ninguru sail tagiral ale munan ningo ningo imitang tal ale nengemang ningi nunguning ko munan karogo biguwural ale te bagaralko: Bagara aolak ningo diram. Ikia ningo la. 6 Nengeta nengeta ninga munan ninguru bitua. Ikup gia ale te sokel ago sanamara. Kaem ko munan ningi bagara. 7 Launuria iwita ninimi saonga. Se ninimi ko kuera. Munan umutang talko sail tagiralko. ^{▼▼2 Peter 1:5-6 Munan ningo ningo: Gal 5:22-23.}

8 Nina nanga Biya Jesus Kristus ko ikiman. Se munan ningo ningo umutang biyala nengete aratuwuruk umutang mu, ninga ikia Kristus ko ikiman mu yam ipi me anirukko, mu ko nunguning suen biya aratukko. 9 Bare awiriya munan mu nukote mena, mu nu motam mena iwita, se motam loagoso mu tukunangta. Mu nu Kaem noko kilek memek ulengkala bita lagaram mu siwu saparam mu ko kuamili saparam.

10 Aga singsang, nina Kaem ninga auram ale nina noko ma balam. Umutang ko noko munan karo tualko ninguru sail tagiralko. Nina uwutata beteral mu nina me dagulalko. 11 Se nanga Kari Biya Jesus Kristus, nanga Sangaru Tata Kari, mu ninga sanguk ale, lage korang biyala kagaru ningaruk, se noko kingdom ningi kasu nagural ale eng tom suen biya ilak bagaralko.

12 Nina mel imi ko iki sapaman, ale den nunguning taman mu te sokel ago bagasan. Bare ani tom suen biya ko am balik se aking ko ikialko. 13 Ani iwita ikisam, tom ani marak bagasam mu mel umu ko ninga ikia sinar awu se bagirikko, umutang mu munan diram. 14 Mu awuk, ani ikisam ani tom maiya mena kuerik ale angimik guang imi kutuwu bitirikko, nanga Biya Kristus aga maonam iwitata. ^{▼▼2 Peter 1:14 Peter: John 21:18-19; 2 Cor 5:1.} 15 Umutang ko, ani mel imi ko ninga manikko ninguru sail tagisam, se udagi te ani kuerik agi, mu den umutang ko iki se lagaralko.

Peter apostle saki arungu Jesus ko sokel se ko nikim aringiman

16 Ana Jesus ko sokel ko ninga manorman, ale peleruk tairukko mu ko ago ninga manorman se ikiman. Bare ana dugu duap saki kawel mu karo tuman ale me te ninga manorman. Mena. Ana nangata nanga namatam te ko sokel aringiman. 17 Mu awuk, tom ana nu ilak duruk kako te tarigiman bagaman mu nu Ba Kaem Nikitang Sokel Karogo mu kote nup biya nikim ago mu tam. Se kuring bo iwita balukaso, “Imi aninga Kuriang, ninguru ko kuesam, ani noko ninguru amilmilasam.” Kuring imi duruk wonong te tai kaparam se, ana nangata nanga nadogowa te ikiman. ^{▼▼2 Peter 1:16-18 Peter Jesus ko sokel arigam: Mat 17:1-5.}

19 Buta se, ana Kaem ko prophet alo nunga den batoga te aniso mu ko ninguru nangamang ningi nunguning aram. Se nina betela den mu ko sinar tal ale ilukuawuralko mu yawarakala. Mu awuk, prophet nunga den mu galep sor tiromorom mu ningi kaniwoso iwita. Se kaniwuruk nama sor ukirok se, ninga nengemang ningi sor ukira ko baras bausok ale nikim ningarukko. 20 Se imi ko ninguru ikialko: Prophet den mu prophet nongota nunga ikia se nongomang motam te me den balukasan. ^{▼▼2 Peter 1:20 Bala bo mu iwita: “Bare imi ko ninguru ikialko: Ana nangata nanga ikia te prophet nunga den batoga te aniso mu ko nunguning balnakko me terong. Bare Korang Bur nanga kausok mu asele ko balnakko.”} Mu awuk, kari bo ta kota ko ikia te prophet den me balukaso. Mena. Korang Bur ikia prophet alo nungarukaso se te Kaem ko kuring balukasan. ^{▼▼2 Peter 1:21 2 Timothy 3:16 ago arikko.}

21